Chuo cha Mipango ya Maendeleo Vijijini (IRDP) kimetunukiwa Tuzo ya Usimamizi Bora wa Huduma za Intaneti kutoka TERNET, ikiwa ni kutambua juhudi za Chuo katika kusimamia na kuendeleza huduma bora za intaneti katika kampasi zake zote mbili za Dodoma na Mwanza. 

Tuzo hiyo ilikabidhiwa  kwa Kaimu Mkuu wa Chuo Profesa  Provident Dimoso leo na Mkuu wa Kitengo cha Teknolojia ya Habari na Mawasiliano (TEHAMA)  Bwana Jabir Saleh Abdi. 

Akizungumza baada ya kuipokea tuzo hiyo, Kaimu Mkuu wa Chuo Profesa Dimoso  aliishukuru TERNET kwa kutambua juhudi zinazofanywa na vyuo katika kuboresha huduma za intaneti. Alieleza kuwa Chuo cha Mipango kimeendelea kuwekeza kwa kiwango kikubwa katika miundombinu ya TEHAMA kwa kutumia rasilimali za ndani pamoja na uwezeshaji uliotolewa na Serikali ya Jamhuri ya Muungano wa Tanzania kupitia mradi wa "Higher Education for Economic Transformation" (HEET).

"Uwekezaji huo umewezesha Chuo kuimarisha huduma za intaneti, kuongeza upatikanaji wa vifaa vya TEHAMA ikiwemo kompyuta, na kuweka mazingira bora ya kujifunzia na kufundishia yanayoendana na mabadiliko ya kidijitali", alisema Profesa Dimoso. 

Vilevile alisisitiza kuwa huduma bora za intaneti zinawawezesha wanafunzi kupata maarifa kupitia machapisho mbalimbali ya kitaaluma na kujifunza stadi muhimu za kidijitali.

Aidha ametumia fursa hiyo  kuwahamasisha wanafunzi kujiunga na Chuo cha Mipango ya Maendeleo Vijijini, akieleza kuwa miongoni mwa programu zinazotolewa chuoni ni kozi zinazohusiana na Teknolojia ya Habari na Mawasiliano, ambazo zinaendana na mahitaji ya sasa ya maendeleo ya kidijitali.

Awali akizungumza wakati wa kukabidhi tuzo hiyo Bw. Jabir alisema kuwa Chuo kimepata tuzo hiyo kufuatia tathimini iliyofanywa na TERNET kwa wateja wake na hivyo kuona Chuo cha Mipango kimefanya vizuri kwenye matumizi na usimamizi mzuri wa huduma  za intaneti.